काठमाडौँ । प्रधानमन्त्री बालेन्द्र शाहको सम्भावित भारत भ्रमणलाई लिएर नेपाल र भारतबीच कूटनीतिक छलफल तीव्र बनेको छ। प्रधानमन्त्री बालेन मंसिर ७ गते भारत भ्रमणमा जाने गरी छलफल भइरहेको स्रोतले जनाएको छ । प्रस्तावित कार्यक्रमअनुसार उनको भ्रमण मंसिर ९ गतेसम्म हुन सक्ने बताइएको छ । यद्यपि, भ्रमणको औपचारिक मिति भने सार्वजनिक भइसकेको छैन ।
भारतमा आयोजित बिमस्टेकको पहिलो गृहमन्त्रीस्तरीय बैठकमा सहभागी हुन पुगेका नेपालका गृहमन्त्री सुधन गुरुङले भारतीय गृहमन्त्री अमित शाहसँग प्रधानमन्त्री बालेनको भारत भ्रमणबारे छलफल गरेका थिए ।
मंगलबार भएको उक्त भेटवार्तामा नेपाल–भारत सम्बन्ध, द्विपक्षीय सुरक्षा सहयोग र सीमा व्यवस्थापनलगायतका विषयमा छलफल भएको भारतस्थित नेपाली दूतावासका कार्यवाहक राजदूत सुरेन्द्र थापाले बताएका छन् । उनका अनुसार प्रधानमन्त्रीको सम्भावित भ्रमणको विषयले पनि भेटवार्तामा स्थान पाएको थियो ।
राजदूत थापाले भ्रमणको मितिबारे खुलाउन नचाहे पनि दुवै देशले तयारी गरिरहेको र आपसी सहमतिमा मिति तय गरिने बताएका छन् ।
परराष्ट्र मन्त्रालयका एक उच्च अधिकारीका अनुसार प्रस्तावित मितिलाई आधार मानेर आवश्यक तयारीसमेत अघि बढाइएको छ । प्रधानमन्त्री कार्यालय र परराष्ट्र मन्त्रालयले भ्रमणका सम्भावित एजेन्डाबारे गृहकार्य गरिरहेका छन् ।
पूर्वाधार र विकासका विषय प्राथमिकतामा
यस पटकको भारत भ्रमणमा नेपाल–भारतबीच विगतमा भएका सम्झौता तथा तिनको कार्यान्वयन, भौतिक पूर्वाधार निर्माण र विकास सहयोगका विषय प्राथमिकतामा रहने अपेक्षा गरिएको छ ।
भोटेकोशीमा आएको बाढीबाट भएको क्षतिपछि भारतबाट प्राप्त हुन सक्ने थप सहयोगबारे पनि छलफल भइरहेको बताइएको छ । त्यस्तै, भारतको सहयोगमा निर्माण भएका केही महत्त्वपूर्ण परियोजनाको उद्घाटन गर्ने तयारीसमेत भइरहेको छ ।
नेपाल प्रहरी एकेडेमी, भैरहवास्थित एकीकृत जाँच चौकी (आईसीपी) र दार्चुलास्थित महाकाली नदीको पुल उद्घाटनका विषय पनि सम्भावित कार्यसूचीमा रहेको बताइएको छ । यद्यपि, यी कार्यक्रमको अन्तिम टुंगो लागिसकेको छैन ।
भ्रमणअघि उच्चस्तरीय भेटघाट तीव्र
प्रधानमन्त्रीको सम्भावित भ्रमणअघि दुवै देशका अधिकारी तथा राजनीतिक प्रतिनिधिबीच भेटघाट बढेको छ । अर्थमन्त्री डा. स्वर्णिम वाग्लेले भारत भ्रमण गरेका थिए भने राष्ट्रिय स्वतन्त्र पार्टीका सांसद मनिष झा पनि भारत पुगेका थिए ।
त्यस्तै, गृहमन्त्री गुरुङको भारत भ्रमणअघि भारतीय सेनाका एडजुटेन्ट जनरल लेफ्टिनेन्ट जनरल वीरेश प्रताप सिंह कौशिक नेपाल आएका थिए । यी भेटघाट र भ्रमणले नेपाल–भारत सम्बन्धका विभिन्न विषयमा संवाद अघि बढाउन सहयोग पुर्याएको बताइएको छ ।
मोदीको निम्तोपछि बालेनको भारत भ्रमणको तयारी
प्रधानमन्त्रीमा नियुक्त भएपछि भारतीय प्रधानमन्त्री नरेन्द्र मोदीले फोनमार्फत बधाई दिँदै बालेनलाई भारत भ्रमणको निम्तो दिएका थिए । पछि लिखित निम्तोसमेत पठाइएको थियो ।
निम्तो प्राप्त भए पनि प्रधानमन्त्री बालेनले तत्काल विदेश भ्रमणमा जाने इच्छा नदेखाएको बताइएको थियो । अहिले भने उनको भारत भ्रमणको तयारी अघि बढेको छ ।
मंसिर ७ गतेको मिति प्रस्तावित भए पनि अन्तिम निर्णय र भ्रमणको औपचारिक घोषणापछि मात्रै प्रधानमन्त्री बालेनको भारत भ्रमणको मिति तथा कार्यक्रम निश्चित हुनेछ ।







0 कमेन्ट
पहिले लगइन वा दर्ता गर्नुहोस्
Administrator ले Registered-only comment mode सक्रिय गर्नुभएको छ।