काठमाडौं । श्रमिकले आफ्नो धर्म, संस्कृति र परम्पराअनुसार मनाउने चाडपर्वका लागि पाउनुपर्ने खर्च नपाए सम्बन्धित निकायमा उजुरी दिन सक्ने भएका छन्। श्रम तथा व्यवसायजन्य सुरक्षा विभागले सबै रोजगारदाता तथा प्रतिष्ठानलाई कानुनअनुसार श्रमिकलाई चाडपर्व खर्च उपलब्ध गराउन आग्रह गरेको छ।
श्रम ऐन, २०७४ को दफा ३७ अनुसार श्रमिकले प्रत्येक वर्ष आफ्नो धर्म, संस्कृति, परम्परा तथा रीतिरिवाजअनुसार मनाउने चाडपर्वका लागि एक महिनाको आधारभूत पारिश्रमिक बराबरको रकम चाडपर्व खर्चका रूपमा पाउने व्यवस्था छ। यसलाई सामान्यतया दसैँ खर्च वा दसैँ बोनस भन्ने गरिए पनि यो सुविधा दसैँमा मात्र सीमित छैन।
विभागका महानिर्देशक चक्रपाणी पाण्डेका अनुसार चाडपर्व खर्च उपलब्ध नगराउने प्रतिष्ठानविरुद्ध श्रमिकले उजुरी दिन सक्छन्। तर, उजुरीमा आवश्यक विवरण स्पष्ट नहुँदा सम्बन्धित निकायलाई कारबाही प्रक्रिया अघि बढाउन कठिनाइ हुने गरेको उनले बताएका छन्।
उनले उजुरी दिँदा उजुरीकर्ताको नाम, ठेगाना तथा उजुरी परेको रोजगारदाता वा प्रतिष्ठानको स्पष्ट विवरण खुलाउन आग्रह गरेका छन्।
चाडपर्व खर्च नपाए कहाँ दिने उजुरी?
कानुनअनुसार पाउनुपर्ने चाडपर्व खर्च नपाएका श्रमिक तथा कामदारले आफ्नो कार्यक्षेत्रअन्तर्गत पर्ने श्रम तथा रोजगार कार्यालय वा श्रम तथा व्यवसायजन्य सुरक्षा विभागमा निवेदन दिन सक्छन्।
त्यसैगरी, विभागको वेबसाइटमा उपलब्ध क्यूआर कोडमार्फत फारम भरेर पनि उजुरी दिन सकिने व्यवस्था रहेको विभागले जनाएको छ।
उजुरी दिन किन हिचकिचाउँछन् श्रमिक?
चाडपर्व खर्च नपाउँदा पनि कतिपय श्रमिक रोजगार गुम्ने डर, उजुरी प्रक्रिया झन्झटिलो हुने आशङ्का तथा समय र खर्च लाग्ने चिन्ताका कारण सम्बन्धित निकायसम्म पुग्न हिचकिचाउने गरेका कानुन व्यवसायीहरू बताउँछन्।
तर, कानुनले सुनिश्चित गरेको सुविधा नपाएमा श्रमिकले सम्बन्धित निकायमा उजुरी दिन सक्ने व्यवस्था छ। त्यसैले उजुरी गर्दा आवश्यक विवरण र उपलब्ध प्रमाण व्यवस्थित रूपमा पेस गर्नु महत्त्वपूर्ण हुन्छ।
श्रमिकका लागि महत्त्वपूर्ण जानकारी: चाडपर्व खर्च पाउनु रोजगारदाताको कानुनी दायित्व हो। आफूले पाउनुपर्ने सुविधा नपाएको अवस्थामा सम्बन्धित श्रम कार्यालय वा विभागसँग सम्पर्क गरी उजुरी प्रक्रियाबारे जानकारी लिन सकिन्छ।







0 कमेन्ट
पहिले लगइन वा दर्ता गर्नुहोस्
Administrator ले Registered-only comment mode सक्रिय गर्नुभएको छ।